Departament bastyǵy polısııa polkovnıgi Q.D.Taımerdenovtiń bastaýymen sherýlik top qyzmet babynda qaza bolǵan áriptesterimizge ornatylǵan eskertkishke gúl shoqtaryn qoıý rásimin jasady.
- 9 Mamyrdy atap ótý tek dástúr ǵana emes, bul bizdiń bostandyǵymyzdy qorǵaǵandardyń aldynda olardyń batyldyǵy men erligine bas ıip, shynaıy rızashylyǵymyzdy bildirý. Búgingi tańda, ásirese Jeńis kúni men Otan qorǵaýshylar kúniniń qarsańynda bizder beıbit ómirdiń qundylyǵyn jaqsy sezinýimiz qajet dep bilemin. Ákelerimiz ben atalarymyzdyń qaharmandyǵy men erlik isterin eske alyp, jaýyngerlik kúzette Otanymyzdyń qaýipsizdigin qamtamasyz etip, beıbit ómir men el tynyshtyǵyn saqtaıtyn adal uldarymyzdy maqtan tutamyz. Áskerı qyzmet árdaıym qasıetti borysh, árbir azamat úshin adaldyqtyń, erlik pen janqııarlyqtyń mektebi boldy.Beıbit kezeńde óz ómirin Otanyn qorǵaýdyń kúrdeli mamandyǵyna arnaǵan jáne búgingi kúni elimizdiń áskerı kúshi men qorǵanys qabiletin arttyrý jolynda qyzmet atqaratyn barlyq azamattarymyzdy shyn júrekten quttyqtaımyz!-dedi Mańǵystaý oblysynyń IID bastyǵy polısııa polkovnıgi Qanat Taımerdenov.
Shara barysynda Ishki ister mınıstrliginiń buıryǵymen qyzmettik mindetterin adal oryndap, jumysta jetken jetistikteri úshin birqatar departament qyzmetkerleri «Quqyq tártibin qamtamasyz etýge qosqan úlesi úshin» medalimen, «Ishki ister organdarynyń úzdigi» tósbelgisimen, Qazaqstan Respýblıkasy IIM-niń «Qurmet gramotasymen»,Qazaqstan Respýblıkasy IIM-niń «Gramotasymen», Qazaqstan Respýblıkasy Ishki ister mınıstrliginiń Alǵys hatyme marapattaldy. Sondaı-aq, ishki ister salasynda uzaq jyl qyzmet jasaǵan kúzet qyzmetin baqylaý bólimshesiniń bastyǵy polısııa polkovnıgi Lobıan Zograb Sedrakovıch pen Jergilikti polısııa qyzmeti bastyǵynyń orynbasary polısııa polkovnıgi Sadýov Orazbaı Jomartulyn saltanatty túrde zeınetkerlikke shyǵaryp salý rásimi ótkizildi.
Jıyn sońynda quttyqtaý sóz alǵan Mańǵystaý oblysynyń Ishki ister departamenti ardagerler keńesiniń tóraǵasy Jarıev Naǵashybaı ardagerlerdi búgingi merekemen quttyqtap, zor densaýlyq, birlik pen tynyshtyq tiledi.
«Otan qorǵaýshylar kúni» men «Jeńis kúnine» oraı ótkizilgen saltanatty shara Aqtaý qalasy Ishki ister basqarmasynda jalǵasyn tapty.
Ataýly mereke sharasy Aqtaý qalasy Ishki ister basqarmasynyń birinshi basshysy mılısııa polkovnıgi N.Qanaevtyń eskertkishine gúl shoqtaryn qoıýdan bastaldy. Basqarma qyzmetkerleri men mereke qonaqtary Uly Otan soǵysynda qaza tapqandar men qyzmettik boryshyn atqarý kezinde qaza tapqandardy bir mınýt únsizdikpen eske aldy.
Saltanatty jıynda 8 qyzmetker ant qabyldap, qyzmettik mindetterin adal atqarǵany úshin IID-niń «Qurmet gramotasymen» 2 qyzmetker, «Alǵys hatymen» 2, qyzmetker marapattalyp, 2 qyzmetkerge «Alǵys» jarııalandy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
